Zëvendëskryeministri i parë, Izet Mexhiti, u shpreh se do të ketë drejtësi dhe llogaridhënie për të gjitha fatkeqësitë që kanë goditur vendin, duke përmendur Koçanin, “Besa Transin”, Spitalin e Tetovës dhe Llaskarcën. Ai theksoi se mafia ka pasur nën kontroll shtetin, por ata nuk do të rrinë duarkryq dhe nuk do të lejojnë që drejtësia të zbehet apo të humbasë vlerën e saj.
“Drejtësia do të vendoset!
Koçani, ‘Besa Trans’, Spitali modular i Tetovës, Llaskarca – kaq shumë tragjedi të rënda me viktima të shumta për një shtet të vogël si Maqedonia e Veriut! Shumë vuajtje, familje të zhytura në pikëllim dhe lot, por shumë pak drejtësi për ata që u prekën!
Ndërsa lutemi për të mbijetuarit dhe përgatitemi t’u japim lamtumirën atyre që humbën jetën tragjikisht më 16 mars, si Qeveri premtojmë se mësimi i rëndë nga Koçani është marrë dhe mesazhi është kuptuar: shteti nuk do të qëndrojë më pasiv dhe nuk do të tolerojë që drejtësia të tretet mes mashtrimeve institucionale, të cilat janë ngritur për të mbrojtur të paprekshmit!
Beteja jonë për një Maqedoni më të drejtë do të ketë kuptim vetëm kur ata që janë trajtuar padrejtësisht nga sistemi të ndiejnë se drejtësia nuk është një koncept i zaptuar nga mafia që ka sunduar shtetin, siç ka ndodhur fatkeqësisht për vite të tëra, dhe se kërkesat e tyre për drejtësi do të gjejnë përgjigje dhe veprim.
Koçani është ndërgjegjja jonë që na nxit të veprojmë. Koçani është dhimbja jonë që kërkon përgjigje. Koçani është çlirimi i një sistemi të kalbur dhe korrupsioni të rrënjosur thellë, i cili ka shkatërruar jetë njerëzish.
Megjithatë, shteti do të reagojë! Përgjegjësit do të mbajnë llogari! Drejtësia do të triumfojë: për Koçanin, për ‘Besa Transin’, për Spitalin e Tetovës, për Llaskarcën, për të gjitha tragjeditë që kanë ndodhur për shkak të korrupsionit dhe pandëshkueshmërisë, duke marrë jetë njerëzish”, tha Mexhiti.
