Pavarësisht arrestimit të bujshëm dhe sekuestrimit të 749 copë lëndë piroteknike, rasti ndaj Drin Ahmetit, nipit të liderit të BDI-së Ali Ahmeti, po zbehet në mënyrë misterioze. Media raportoi se ai ishte ndaluar nga njësia speciale “Tigrat” në një Range Rover me targa të Shqipërisë, por që atëherë, organet e drejtësisë duket se kanë ndjekur një qasje heshtjeje dhe zvarritjeje.
Prokuroria publikoi një deklaratë të thatë: “Në varësi të fakteve që do të konstatohen me ekspertizë për mjetet piroteknike të gjetura, prokurori publik do të vendos për rrjedhën e mëtutjeshme të procedurës.” Por kjo deklaratë daton muaj më parë. Çfarë ka ndodhur që atëherë? A është hetuar rasti seriozisht apo është arkivuar nën trysninë politike?
Drejtësia që nuk mbërrin te të pushtetshmit
Drin Ahmeti nuk është një emër i panjohur për publikun apo për organet e rendit. Emri i tij është përmendur në një varg çështjesh të diskutueshme, nga kontratat publike me kompani si “Everest JD”, që përfituan miliona nga tenderët, e deri te shfrytëzimi i paligjshëm i resurseve minerare. Megjithatë, në asnjë prej këtyre rasteve ai nuk është ndjekur penalisht deri në fund, pavarësisht dyshimeve të bazuara dhe raportimeve të shumta mediatike.
Rasti i piroteknikës mund të ishte një pikë kthese për institucionet e drejtësisë. Por mungesa e çdo informacioni të mëtejshëm nga Prokuroria ka rritur spekulimet se edhe ky hetim do të përfundojë si shumë të tjerë më parë – në heshtje dhe pa pasoja.
A po e shmang drejtësinë Drin Ahmeti?
Burime jozyrtare flasin për largimin e mundshëm të Drin Ahmetit drejt Shteteve të Bashkuara të Amerikës, duke ngritur dyshime serioze se ai po i shmanget drejtësisë. Nëse këto informacione janë të sakta, si është e mundur që një person me dosje të hapur të largohet nga vendi pa asnjë ndalim kufitar? A kemi të bëjmë me një sistem të paralizuar apo me një drejtësi të kontrolluar politikisht?
Sa zgjat imuniteti familjar?
Kreun e BDI-së, Ali Ahmeti, e kanë ndjekur prej vitesh akuza publike për shndërrimin e rrethit të tij familjar në një elitë ekonomike me përfitime të drejtpërdrejta nga shteti. Drin Ahmeti, nga një emër i panjohur, u bë për një periudhë të shkurtër menaxher i qendrës së njohur “Soravia” në Shkup, ndërkohë që kompania e tij përfitonte nga kontratat publike dhe gëzonte imunitet institucional.
Deri kur Prokuroria do të heshtë përballë lidhjeve familjaro-politike?
A është drejtësia selektive dhe e frikësuar kur përballë ka emra të pushtetshëm?
A do të zbardhet ndonjëherë pasuria dhe rrjeti i përfitimeve që rrotullohet rreth rrethit të ngushtë të Ali Ahmetit?
Në mungesë të përgjigjeve konkrete nga organet e drejtësisë, qytetarëve u mbetet të ndjekin edhe një skandal tjetër që zbehet në errësirën e mosveprimit.
