Ministria e Punëve të Brendshme ka paraqitur kallëzime penale në Prokurorinë Themelore të Shkupit kundër pesë personave fizikë dhe një personi juridik për shkelje të procedurave të prokurimit publik në lidhje me përzgjedhjen e një kompanie për sigurim fizik në 14 stacione pagese të Ndërmarrjes Publike për Rrugët Shtetërore. Kallëzim penal është ngritur kundër:
Ejup Rrustemi – Ish-drejtori i Ndërmarrjes Publike për Rrugët Shtetërore,,
Drilon Ziberi – përgjegjës i sektorit për pagesa dhe kontroll në pikat e pagesave,
Ejup Latifi – ndihmës drejtor për mirëmbajtjen e rrugëve dhe
Xhemal Bilbilovski – pronar i kompanisë së sigurimit “2SS” (i afërm i Shefik Ismaili – shoferit të Ali Ahmetit)
Është hapur një hetim kundër drejtorit të atëhershëm të kompanisë nga Kërçova dhe subjektit juridik për veprën penale “shkelje e procedurës së thirrjes publike, dhënia e kontratës për prokurim publik ose partneritet publik-privat” sipas nenit 275-ç të Kodit Penal, ndërsa për katër të tjerët – ish-drejtorin e ndërmarrjes, një nga nënshkruesit e kontratës dhe dy të autorizuarit për mbikëqyrjen e zbatimit – po zhvillohet procedurë për shkelje të detyrës zyrtare dhe falsifikim të dokumenteve zyrtare.
Në lidhje me këtë rast, bëhet fjalë për një kontratë prokurimi publik të nënshkruar më 8 gusht 2022, ku administratori i dyshuar i agjencisë së sigurimit ishte angazhuar të ofrojë mbrojtje fizike 24/7 në të gjitha 14 stacionet e pagesave të Ndërmarrjes Publike për Rrugët Shtetërore për një periudhë dyvjeçare.
Megjithatë, ai nuk e ka përmbushur këtë detyrim dhe ka siguruar vetëm mbrojtje fizike të pjesshme, kryesisht gjatë turnit të parë, ndërsa faturat janë lëshuar për shërbime sikur të ishin ofruar 24/7 gjatë gjithë periudhës së kontratës, deri në ndërprerjen e saj.
Ish-drejtori i ndërmarrjes kishte për detyrë të mbikëqyrte ligjshmërinë e punës dhe zbatimin e rregullave, por ai e ka keqpërdorur këtë detyrë duke mos kryer mbikëqyrjen e nevojshme, pavarësisht se ishte i informuar që sigurimi fizik ofrohej vetëm pjesërisht.
Dy drejtorë të tjerë të departamentit për mbledhjen e taksave dhe mbikëqyrjen e pagesave gjithashtu nuk e kanë kryer mbikëqyrjen e duhur dhe, megjithatë, kanë miratuar kërkesat për pagesa, edhe pse ishin në dijeni se sigurimi fizik ishte ofruar vetëm pjesërisht.
Nënshkruesi i dytë i kontratës ka miratuar kërkesat dhe faturat për pagesa, pavarësisht se ishte i njohur me specifikimet, dhe këto fatura janë paguar për agjencinë e sigurimit.
Në këtë mënyrë, të dyshuarit e tjerë kanë mundësuar që agjencia e sigurimit të përfitonte një shumë të paligjshme prej 46,918,079 denarë, duke i shkaktuar dëm të madh Ndërmarrjes Publike për Rrugët Shtetërore. Prokurori i Posaçëm ka kërkuar masën e paraburgimit për të dyshuarin e parë, ndërsa për të tjerët janë propozuar masa të kujdesit.
