Aktivisti qytetar Jasir Asani ka kritikuar ashpër BDI-në, duke i cilësuar si manipulues dhe duke i akuzuar për heshtje përballë tragjedive ku kanë humbur jetën dhjetëra shqiptarë, ndërkohë që tani po mobilizohen për të mbrojtur një ish-zyrtar të partisë.
“Asnjëherë nuk keni reaguar për 14 shqiptarët që u dogjën në spitalin modular në Tetovë, për 16 viktimat në aksidentin e Llaskarcës, për 45 shqiptarët që humbën jetën në autobusin e djegur në Bullgari apo për ata që u vranë në Kumanovë. Por sot, sepse ju ka thënë partia, dilni në mbrojtje të një ish-funksionari,” ka shkruar Asani.
Sipas tij, kjo dëshmon se për BDI-në ka më shumë rëndësi të mbrojë zyrtarët e vet sesa të kërkojë drejtësi për qindra jetë të humbura. “Disa gjëra nuk mund të falen! Është koha për të mbajtur përgjegjësi,” tha ai në përfundim.
Duhet rikujtuar se ish-ministri i Ekonomisë nga BDI-ja, Kreshnik Bekteshi, është aktualisht në paraburgim si i dyshuar për lëshimin e një licence për një klub nate në Koçan, i cili nuk i përmbushte kushtet e nevojshme. Si pasojë, para disa ditësh, në të njëjtin klub humbën jetën 59 qytetarë dhe mbi 100 të tjerë u lënduan.
