Ministri i Punëve të Jashtme, Timço Mucunski, i ka hedhur poshtë pretendimet e opozitës për refuzimin e vizës amerikane të ministrit të Punës dhe Politikës Sociale, Fatmir Limani.
Në një prononcim për televizionin Sitel, Mucunski u shpreh se opozita përhap informacione të rreme dhe spekulime, për të cilat më pas është e detyruar të kërkojë ndjesë.
“Më duhet të theksoj edhe një herë se, për shkak të mungesës së ideve dhe vizionit për të kontribuar në ndërtimin e një shteti më të mirë, opozita bie në situata ku i duhet të kërkojë falje për deklaratat e saj, të cilat bazohen në dezinformata, spekulime dhe gjysmë të vërteta.
Me plot përgjegjësi, si ministër i Punëve të Jashtme, mund të them se z. Limani nuk është refuzuar për vizë nga Shtetet e Bashkuara. Nuk mund të jap më shumë hollësi, duke pasur respekt për partnerin tonë strategjik dhe për privatësinë e z. Limani. E ripërsëris, si ministër i Punëve të Jashtme, me përgjegjësi të plotë deklaroj se z. Limani nuk ka marrë refuzim për vizën amerikane,” u shpreh Mucunski.
